(سوال) کیا فرماتے ہیں علمائے کرام کہ کیا پہلے غوثِ اعظم رضی الله عنه کا بغیر وضو نام لینے والا شخص ہلاک ہو جاتا تھا؟ مع حوالہ جواب عنایت فرمائیں بڑی مہربانی ہوگی
(جواب) تفریح الخاطر (ص: ١٨) میں ہے کہ گلزار معانی میں مذکور ہے کہ ابتدائے میں آپ پر جلالیت کا بہت غلبہ تھا اور اس غلبہ کی یہ حالت تھی کہ جو شخص آپ کا نام بغیر وضو کے لیتا ہلاک ہو جاتا۔ ایک روز آپ کو سرکار دو عالم ﷺ نے خواب میں فرمایا کہ عبدالقادر اس حالت کو چھوڑ دے کیونکہ ایک ایسا زمانہ آنے والا ہے جس میں لوگ الله تعالی اور میرا نام بھی بغیر ادب اور رحمت کے ذکر کریں گے تو آپ رحمة الله علیه نے امت مصطفیٰ پر رحم فرمایا اور اس حالت کو ترک کیا۔ اسی میں آگے ہے کہ بغداد کے اولیاء کرام نے حضرت غوث اعظم رضی الله عنہ کی خدمت میں حاضر ہو کر عرض کیا کہ آپ لوگوں کے حال پر رحم فرمائیں اور اس گناہ کو معاف فرمائیں تو آپ علیہ الرحمہ نے ارشاد فرمایا کہ میں تو اس حالت کو پسند نہیں کرتا کیونکہ الله تعالی نے مجھے خطاب کر کے فرمایا ہے کہ عبدالقادر تو نے میرے نام کی عزت کی اور ہم تیرے نام کی عزت کریں گے اور جو عزت کرتا ہے وہ معزز بن جاتا ہے گلزار معانی کس نے لکھی اور یہ کیسی کتاب ہے، ہمیں اس کا علم نہ ہوسکا اور یہ واقعہ ایسا نہیں ہے کہ محض تفریح الخاطر میں مذکور ہونے کے سبب اس پر اعتماد کیا جا سکے والله تعالى أعلم بالصواب
كتبه: ندیم ابن علیم المصبور العینی