روزے کی حالت میں کاجل لگا سکتے ہیں یا نہیں

            السلام علیکم و رحمۃ اللہ وبرکاتہ 

کیا فرماتے ہیں علماء کرام و مفتیان عظام اس مسئلہ کے بارے میں کہ کیا روزے کی حالت میں آنکھوں میں کاجل لگا سکتے ہیں یا نہیں ؟برائے کرم مفصل جواب عنایت فرمائیں عین نوازش ہوگی 

        سائل : محمد دانش رضوی رامپوری 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

          وعلیکم السلام ورحمۃ اللہ وبرکاتہ 

               الجواب بعون الملک الوہاب 

روزے کی حالت میں سرمہ و کاجل لگانا جائز ہے اگرچہ اسکا اثر تھوک میں ظاہر ہو اس سے روزہ نہیں ٹوٹیگا مگر مرد کو سرمہ و کاجل بقصد زینت لگانا علاوہ روزہ کے بھی مکروہ ہے اور حالت روزہ میں بدرجۂ اولی مکروہ ہےجیساکہ حضور صدر الشریعہ بدر الطریقہ علیہ الرحمۃ والرضوان بہار شریعت میں تحریر فرماتے ہیں کہ گلاب یا مشک وغیرہ سونگھنا, داڑھی مونچھ میں تیل لگانا اور سرمہ لگانا مکروہ نہیں مگر جبکہ زینت کے لئے سرمہ لگایا یا اس لئے تیل لگایا کہ داڑھی بڑھ جائے حالانکہ ایک مشت داڑھی ہے تو یہ دونوں باتیں بغیر روزہ کے بھی مکروہ ہیں اور روزہ میں بدرجۂ اولی " اھ( ح:5/ص:997/ روزہ کے مکروہات کا بیان / مجلس المدینۃ العلمیۃ دعوت اسلامی) اور درمختار میں ہے کہ لا یکرہ دھن شارب ولا کحل اذا لم یقصد الزینۃ أو تطویل اللحیۃ اذا کانت بقدر المسنون وھو القبضۃاھ( ج:3/ص:397/ کتاب الصوم / باب ما یفسد الصوم وما لا یفسدہ / دار عالم الکتب ) اور فتاوی ھندیہ میں ہے کہ و اذا بزق فرائ اثر الکحل و لونہ فی بزاقہ عامۃ المشائخ علی انہ لا یفسد صومہ کذا فی الذخیرۃ و ھو الاصح ھکذا فی التبین " اھ( ج:1/ص:203/ الباب الرابع فیما یفسد وما لا یفسد / بیروت ) 

              واللہ تعالیٰ اعلم باالصواب 

کتبہ اسرار احمد نوری بریلوی خادم التدریس والافتاء مدرسہ عربیہ اہل سنت فیض العلوم کالا ڈھونگی ضلع نینی تال اتراکھنڈ