روزے کی حالت میں برش کرنا کیسا ہے

               السلام علیکم و رحمۃ اللہ وبرکاتہ

کیا فرماتے ہیں علماء کرام و مفتیان عظام اس مسئلہ کے بارے میں کہ روزے کی حالت میں برش و پیسٹ سے دانت صاف کرنے سے کیا روزے پر کوئی اثر نہیں پڑتا برائے مہربانی مکمل طور پر جواب عنایت فرمائیں عین نوازش ہوگی

               . سائل : محمد شاکر رضوی

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

          وعلیکم السلام ورحمتہ اللہ وبرکاتہ 

                الجواب بعون الملک الوہاب 

روزے کی حالت میں برش و پیسٹ وغیرہ سے دانت صاف کرنا ناجائز و حرام نہیں ہے جبکہ یقین ہو کہ اسکا کوئی جز حلق میں نہ جائے گا ہاں مکروہ ہے - فتاوی رضویہ جلد چہارم صفحہ 614/ میں ہے کہ " منجن ناجائز و حرام نہیں ہے جبکہ اطمینان کافی ہو کہ اسکا کوئی جز حلق میں نہ جائے گا مگر بے ضرورت صحیحہ کراہت ضرور ہے - درمختار میں ہے کہ " کرہ ذوق شئی " اھ( بحوالہ فتاوی فقیہ ملت ج:1/ص:343/ کتاب الصوم / شبیر برادرز اردو بازار لاہور) اور فتاوی ھندیہ میں ہے کہ " و کرہ ذوق شئی و مضغہ بلا عذر کذا فی الکنز " اھ( ج:1/ص:199/ الباب الثالث فیما یکرہ للصائم وما لا یکرہ / بیروت) اور نورالایضاح میں ہے کہ " کرہ للصائم سبعۃ اشیاء ذوق شئی و مضغہ بلا عذر " اھ (ص:164/ مجلس البرکات) مذکورہ حوالہ جات سے روز روشن کی طرح واضح ہوگیا کہ حالت روزہ میں برش و پیسٹ , منجن وغیرہ سے دانت صاف کرنا کراہت کے ساتھ جائز تو ہے مگر نہ کرنا ہی بہتر ہے اس لئے کہ اگر احتیاط نہ ہوسکی اور کوئی ذرہ حلق سے نیچے اترگیا تو روزہ فاسد ہوجائےگا-

                 واللہ تعالیٰ اعلم باالصواب 

کتبہ اسرار احمد نوری بریلوی خادم التدریس والافتاء مدرسہ عربیہ اہل سنت فیض العلوم کالا ڈھونگی ضلع نینی تال اتراکھنڈ