سجدہ تلاوت کیا ہے اور اسکے ادا کرنے کا طریقہ کیا ہے؟؟؟

           السلام علیکم ورحمتہ اللہ وبرکاتہ 

کیا فرماتے ہیں علمائے کرام ومفتیان عظام اس مسئلہ کے بارے میں کہ تلاوت قرآن کرتے وقت جو سجدہ آتا ہے اسے کیسے کریں . مع دلیل پیش فرمایں بہت نوازش ہوگی 

               سائل محمد صادق اعظمی

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

           وعلیکم السلام ورحمۃ اللہ وبرکاتہ 

             الجوابـــــ بعون الملکـــــ الوھاب 

سجدۂ تلاوت کرنے کا مسنون طریقہ یہ ہے کہ کھڑا ہوکر اللہ اکبر کہتا ہوا سجدہ میں جائے اور کم سے کم تین بار سبحان ربی الاعلی کہے پھر اللہ اکبر کہتا ہوا کھڑا ہوجائے-پہلے پیچھے دونوں بار اللہ اکبر کہنا سنت ہے اور کھڑے ہوکر سجدہ میں جانا اور سجدہ کے بعد کھڑا ہونا یہ دونوں قیام مستحب - اھ بہار شریعت ح:4/ص:731/ سجدۂ تلاوت کا بیان / مجلس المدینۃ العلمیۃ دعوت اسلامی اور درمختار میں ہے کہو ھی سجدۃ بین تکبیرتین مسنونتین جھرا و بین قیامین مستحبین بلا رفع ید و تشھد و سلام و فیھا تسبیح السجود فی الأصح " اھ( ج:2/ص:580/ کتاب الصلاۃ / باب سجود التلاوۃ / دار عالم الکتب) اور فتاوی ھندیہ میں ہے کہ والمستحب انہ اذا اراد ان یسجد للتلاوۃ و یقوم ثم یسجد و اذا رفع رأسہ من السجود یقوم ثم یتعد کذا فی الظھیریۃ " اھ( ج:1/ص:135/ الباب الثالث عشر فی سجود التلاوۃ / بیروت) اور اگر نماز کے درمیان آیت سجدہ آجائے تو فورا سجدہ کرنا واجب ہوگا کہ آیت سجدہ پڑھنے کے بعد اللہ اکبر کہتے ہوئے فورا سجدہ میں جائے اور ایک سجدہ کرکے پھر اللہ اکبر کہتے ہوئے کھڑاہوجائے پھر قرأت کرکے رکوع کرے.(عامہ کتب فقہ)

                واللہ تعالیٰ اعلم بالصواب 

کتبہ اسرار احمد نوری بریلوی خادم التدریس والافتاء مدرسہ عربیہ اہل سنت فیض العلوم کالا ڈھونگی ضلع نینی تال اتراکھنڈ 28---اپریل ---2020---بروز منگل