افطار کب کرنی چاہئے وقت ہونے پر یا اذان کا انتظار کریں

        السلام علیکم ورحمتہ اللہ تعالی وبرکاتہ

آپ لوگوں کی خدمت میں ایک سوال لے کر حاضر ہوا ہوں سوال یہ ہے کوئی ایسی جگہ ہے جہاں پر افطار کا وقت شروع ہونے کے دس منٹ بعد اذان ہوتی ہے تو کیا اذان کا انتظار کریں گے یا پھر افطار کریں مدلل مفصل جواب عنایت فرمائے

     سائل محمد شاکر رضوی جہاں آباد یو پی 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

        وعلیکم السلام ورحمتہ اللہ وبرکاتہ

     الجــــــــــــــــــــواب بعون الملک الوہاب 

سورج غروب ہونے کے بعد روزہ اِفطار کرنے میں تأخیر نہیں کرنی چاہئے، پیارے آقا صلی اللہ تعالی علیہ وآلہ وسلم کا ارشاد ہے کہ “میری اُمت خیر پر رہے گی جب تک سحری کھانے میں تأخیر اور (سورج غروب ہونے کے بعد) روزہ اِفطار کرنے میں جلدی کرتے رہیں گے (مسندِ احمد ج:۵ ص:۱۷۲) ایک اور حدیث میں ہے کہ“لوگ ہمیشہ خیر پر رہیں گے جب تک کہ روزہ اِفطار کرنے میں جلدی کریں گے” (صحیح بخاری و مسلم، مشکوٰة ص:۱۷۵)ایک اور حدیث میں ہے کہ“اللہ تعالیٰ فرماتاہے کہ مجھے اپنے بندوں میں سے وہ لوگ زیادہ محبوب ہیں جو اِفطار میں جلدی کرتے ہیں۔”(ترمذی، مشکوٰة ص:۱۷۵)ایک اور حدیث میں ہے کہ“دین ہمیشہ غالب رہے گا جب تک کہ لوگ اِفطار میں جلدی کریں گے کیونکہ یہود و نصاریٰ تأخیر کرتے ہیں۔(ابوداوٴد، ابنِ ماجہ، مشکوٰة ص:۱۷۵)اسی طرح افطاری جلد کرنے کی حکمت یہ ہے کہ اس طرزِ افطاری سے یہود و نصاریٰ کی مخالفت مقصود ہے کیونکہ یہود و نصاریٰ روزہ تاخیر سے افطار کرتے ہیں۔ ستاروں کے ظاہر ہونے تک انتظار کرتے ہیں جس سے نجوم پرستی کا شائبہ پیدا ہوتا ہے۔ جب تک امتِ مسلمہ افطار میں جلدی اور سحری میں تاخیر کرتی رہے گی اس وقت تک سنت کی پابندی اور حدودِ شرع کی نگرانی کی وجہ سے خیریت اور بھلائی پر قائم رہے گی۔مگر یہ ضروری ہے کہ سورج کے غروب ہوجانے کا یقین ہوجائے تب روزہ کھولنا چاہئےـ

             واللہ و رسولہ اعلم بالصواب۔

محمد نوشاد عالم کٹیہار بہار الھند( ۸ ـ رمضان المبارک ۱۴۴۱ ھجری